18/05/2010 Publicado en Estudantes, Os campus, PAS, Profesorado, Programa
Nestes últimos quince días de campaña electoral ao reitorado da Universidade de Vigo temos falado de moitos temas: infraestruturas, adaptación ao Espazo Europeo de Educación Superior, investigación… mais son consciente de que o activo máis valioso que ten a nosa universidade son as persoas que traballan e estudan nela. Por este motivo, o noso lema de campaña é “Somos quen”, pois confiamos no noso potencial humano para facer fronte aos retos de futuro que nos agardan nos próximos anos.
Os recursos humanos son prioritarios para o noso modelo de universidade e por iso incluímos no noso programa de goberno numerosas accións encamiñadas a aproveitar todo o noso talento e multiplicar o seu potencial.
Traballaremos en acadar unha formación integral dos nosos estudantes, intensificando os programas de prácticas en empresas e institucións e facilitando a súa inserción laboral a través da posta en marcha de plans de empregabilidade e o apoio á creación de empresas a través da posta en marcha de viveiros empresariais nos tres campus. Ademais, fomentaremos a mobilidade dos nosos estudantes e procuraremos a captación de estudantes foráneos a través dunha oferta de posgrao atractiva e de prestixio.
Faremos un esforzo especial para consolidar o noso persoal docente axudante e investigador dándolle continuidade ás políticas de captación de talento e promoción da calidade seguidas nos últimos anos e que permitiron xa a incorporación ao cadro de persoal de sesenta doutores/as. Para iso, porase en marcha un plan de choque especial que permita que todo o persoal axudante e investigador acreditado poida ter a oportunidade de concursar a unha praza fixa. Non podemos permitirnos desperdiciar nin unha soa pinga de talento. Se algún/ha doutor/a novo/a, a pesar da súa vontade e adicación, se sente excluído na nosa universidade é síntoma de que algo non funciona correctamente.
No atinxente ao persoal de administración e servizos, darémoslle prioridade á negociación do seu convenio colectivo, potenciaremos a súa formación e definiremos unha carreira profesional sen incertezas, capaz de identificar claramente os camiños da súa promoción e consolidación.
Por último, poremos especial énfase no desenvolvemento de plans de conciliación e igualdade, dentro da estratexia de política social da nosa universidade. Para iso desenvolverase un plan de igualdade e aprobarase o Plan Concilia.
Todas estas medidas forman parte dun proxecto colectivo e integrador, aberto e vivo, orientado cara ás persoas, que aspira a superar os retos que ten por diante a universidade nos vindeiros anos coa participación activa de todos e todas. Porque o noso lema “Somos quen” non se refire exclusivamente aos membros desta candidatura, alude a todas as persoas que forman parte desta Universidade.
Amigas e amigos, o xoves confiamos en acadar o voso respaldo para gobernar esta Universidade na próxima lexislatura. Nos tempos que corren, a nosa institución quere un equipo ambicioso e que sexa capaz de converter as adversidades en oportunidades. E nós asumimos o reto de situar a Universidade de Vigo á vangarda do Sistema Universitario de Galicia.
Agora, máis que nunca. ¡Somos quen!
Salustiano Mato
